Wat is geestelike volwassenheid?

haalplantuitpotWat is geestelike volwassenheid?

Die vraag in vandag se preek is: Wat is geestelike volwassenheid? Wanneer tree jy geestelik volwasse op? Die boek Filippense gee vir ons ‘n duidelike antwoord op die belangrike geestelike vraag.

In die sielkunde onderskei ‘n mens tussen vroeë volwassenheid (20 – 40 jaar). Dit is gewoonlik die tyd wat ‘n mens belangrike besluite neem in jou lewe soos jou beroep, jou lewensmaat en hoeveel kinders jy wil hê. Middel volwassenheid of dan middeljare (40 – 60) is gewoonlik die tyd in jou lewe, waar jy begin nadink oor jou lewe. Laat volwassenheid of dan bejaardheid (60 +) is gewoonlik die tyd van aftrede. Sielkundige volwassenheid het egter niks te doen met geestelike volwassenheid nie. ‘n Mens kan dikwels ‘n diep volwasse mens vind wat baie kinderagtig en onvolwasse optree.

Geestelike volwassenheid het te doen met jou verhouding met God en met jou medemens. Dit het ‘n diep geestelike karakter. Geestelike volwassenheid skryf Paulus is nie iets wat jy kan bereik of by ‘n punt kan kom en sê ek is nou geestelik volmaak nie. Geestelike volwassenheid skryf Paulus is eerder ‘n reis, ‘n proses, ‘n doelwit wat jy nastreef.

Daarom skryf Paulus in Fil 3: 12: “Ek sê nie dat ek dit alles al het nie, maar ek span my in om dit alles myne te maak omdat Christus Jesus my reeds Syne gemaak het.” In die Grieks is dit ook iets waaraan ek werk (‘n proses) met die oog op die bereiking in die toekoms. Daarom is geestelike volwassenheid iets wat ons lewenslank besig is om te word.

Geestelike volwassenheid kom deur ervaring. Deur ons foute en mislukkings leer ons om beter en meer ervare te word in ons geestelike lewe. Daarom praat ons dikwels in die kerkgeskiedenis van die kerkvaders en kerkmoeders. Dit is hulle wat met die Evangelie oud geword het. Hulle wat geval het en weer opgestaan het.

Geestelike volwasse mense is soos ronde rivierklippe wat deur die vloei van die rivier ‘n unieke bepaalde karakter gekry het, wat aan hulle besondere skoonheid gee.

Die boek Hebreërs praat ook van die geloofshelde. Dit is hulle wat oor ‘n lang tydperk in hulle geloof gevorm is.

Geestelike volwassenheid is om jou los te maak van die ou sondige mens en jou hele lewe te rig op Jesus Christus. Daarom sê Fil 3: 13b : “Maar een ding doen ek, ek maak my los van wat agter is en strek my uit na wat voor is.” Mense wat in gister se verbittering, onvergewensgesindheid en ou twiste bly lewe, kan nie groei na geestelike volwassenheid nie.

Somtyds moet ‘n mens ‘n potplant verplant uit sy ou houer met dooie grond in ‘n nuwe houer met vars nuwe ryk komposgrond. So moet ek uit my verlede verplant word in die ryk komposgrond van die bevrydende Evangelie.

Somtyds kry ons dit nie reg, om die verlede te begrawe nie. Ons wil in die ou grond bly leef. Daarom roep Paulus ons op om ons los te maak van alles in die verlede wat my kan terughou op my pad van geestelike volwassenheid.

‘n Noodsaaklike treë na volwassenheid is om verantwoordelikheid te aanvaar vir jou eie en vir ander se lewe. Dit beteken om met “commitments” te lewe. Geestelike volwassenheid is om met “commitments” te lewe. Paulus gebruik die woorde: “Ek span my in om by die wenstreep te kom”. Ons moet as’t ware onsself geestelik inspan om God en ons medemens te dien.

Die probleem van die post – moderne mens is dat hy / sy net aan die self “commit” is. Ons word verbruikers van die godsdiens. Ons wil onsself nie meer “inspan” in ons godsdiens nie. Nee, ons wil ontspanne op die rusbank na ‘n kerkdiens oor die TV luister.

Dit is te veel inspanning om moeite te maak om kerk toe te gaan of om betrokke te wees in die kerk en gemeenskap. Ons wil gedien word in plaas van om te dien. Die post – moderne mens raak los van God, van ander mense en van die gemeenskap. Dit lei tot enorme vereensaming van die post – moderne mens, wat sonder enige verantwoordelikheid wil lewe. Dan word jy geestelik onvolwasse.

‘n Geestelik onvolwasse mens wil net ontvang soos ‘n kind of ‘n tiener. ‘n Geestelik onvolwasse mens het nog nie geleer om verantwoordelikheid te aanvaar vir die kerk en gemeenskap nie.

Daarom moet die kerk ‘n oorlogskip wees en nie ‘n passasierskip nie. Op ‘n oorlogskip is daar nie plek vir passasiers nie. Elke manskap het ‘n verantwoordelikheid op die skip. Daarteenoor is ‘n passasierskip vol mense wat ontspanne bedien wil word op die skip.

Geestelike onvolwassenheid het ook baie daarmee te doen dat die mens nie meer kan volhard nie.

Ons wil van emosies lewe en vergeet om God te dien, wanneer die pad somtyds ‘n woestynpad word met min oasisse.

Volharding is om aan te hou al is my motivering laag of “al is ek nie lus nie”. Dit is om aan te hou om op die goeie pad te bly, waarop ons begin het. Dikwels sien ‘n mens by langafstande wedlope of marathons, dat atlete langs die pad moeg word, uitsak en die wedloop staak.

Paulus roep ons egter op in Fillipense om die goeie wedloop van die geloof te volhard en die wenstreep in die oog te hou. Dikwels kan die sorge van die lewe of geestelike lamheid en geestelike luiheid ons laat struikel om op te hou om die wedloop van die geloof te hardloop. Daarom moet ons Christus voor oë hou, sodat ons nie veragter in die geloof nie. Geestelike volwassenheid het dus alles te doen met volharding in jou geestelike verantwoordelikhede.

Ons het nou die vraag beantwoord wat laat jou groei tot geestelike volwassenheid. Die vraag is nou wat is geestelike volwassenheid?

Die-vrugte-van-die-Gees-300x300Dit beteken om met geesvervuldheid altyd VOLWASSE in die Geestesgawes van die Gees op te tree. Gal 5 praat van liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.

Daarteenoor is ‘n geestelik onvolwasse persoon vol van onsedelikheid, onreinheid, losbandigheid, afgodsdiens, towery, vyandskap, naywer, woede, rusies, verdeeldheid, skeuring, afguns, dronkenskap, uitspatigheid en al dergelike dinge.

Daarom is ‘n geestelik volwasse mens iemand wat onder die beheer en die leiding van die Heilige Gees staan. ‘n Geestelik volwasse mens is onder nuwe bestuur. Dit is nie meer die “eie ek” nie, maar wat is die wil van God vir my lewe.

‘n Geestelik volwasse mens is “commit” aan God, die Here se kerk en aan sy medemens in die gemeenskap. Volwassenheid het alles te doen met VERANTWOORDELIKHEID. Ons mag nie ons geestelike verantwoordelikhede verwaarloos of vergeet nie.

(Ds. Paul Odendaal is leraar van die NG Kerk Adelaide.)

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google+ photo

Jy lewer kommentaar met jou rekening by Google+. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s